Հ.Մ.Ը.Մ.Ի ԼԻԲԱՆԱՆԻ ՇՐՋԱՆԱՅԻՆ ԽՄԲԱՊԵՏՈՒԹԵԱՆ ՄԻՋ-ՄԱՍՆԱՃԻՒՂԱՅԻՆ ՍԵՄԻՆԱՐԸ
Հովանաւորութեամբ Հ.Մ.Ը.Մ.ի Լիբանանի Շրջանային Սկաուտական Խորհուրդին, կազմակերպութեամբ Շրջանային խմբապետութեան, միջ-մասնաճիւղային խմբապետական դաստիարակչական սեմինար մը տեղի ունեցաւ Հ.Մ.Ը.Մ.ի Ճիւնիի ակումբին մէջ։ Սեմինարը նպատակադրեց.-
- Կազմակերպչական աշխատանքներով եւ արդիական ձեւերով կիրարկել սկաուտական աշխատանքներն ու յայտագիրները:
- Խմբապետներու համագործակցութեան ոգին բարելաւել:
- Կարգապահական միջոցներու օգտագործման կարեւորութիւնը շեշտել:
- Զօրացնել ծնողք-խմբապետ-անդամ եռակողմանի յարաբերութիւններու կապը:
Սեմինարը ընդգրկեց նաեւ սկաուտական, կազմակերպչական եւ դաստիարակչական կարգ մը նիւթեր:
Առաջին նիւթն էր` «Ժողովական կեանք եւ կազմակերպչական աշխատանք»: Ներկայացուց եղբ. Յակոբ Չպլաքեան:
Քոյր Վարդուկ Ֆռնըզլեան ներկայացուց սկաուտական աշխատանքներու ընթացքին կիրարկուելիք կարգապահական կանոնները եւ գործելաոճը, ինչպէս նաեւ՝ կարգապահական հրահանգներու անթերի իրագործման կարեւորութիւնը:
Ապա, մասնաճիւղի եւ միաւորի խմբապետները, գլխաւորութեամբ եւ հսկողութեամբ Շրջանային ճիւղի խմբապետներու` քոյր Ռուբինա Խայեաթ-Եսայեանի, եղբայրներ Ժագ Պէրպէրեանի եւ Տաթեւ Ադամեանի, գործնական օրինակներով ներկայացուցին սկաուտական արարողութիւններու ձեւերը, որպէսզի մասնաճիւղերը նոյնանման եւ ճշգրիտ ձեւով կատարեն սկաուտական իրենց արարողութիւնները:
Կատարուեցան հետեւեալ արարողութիւնները` կարգապահական հրահանգներու կողքին:
- Դրօշակի արարողութիւն:
- Մեծ կանչ:
- Արի-արենոյշներու խոստման արարողութիւն:
- Երէց-պարմանուհիներու երդման արարողութիւն:
- Երէց- պարմանուհիներու ընդունման արարողութիւն:
- Փոխանցման արարողութիւն (մոկլի, գայլիկ-արծուիկ, արի-արենոյշ, երէց-պարմանուհի):
- Միաստղ, երկաստղ, վեցեակապետ, փոխ վեցեակապետ, վարիչ վեցեակապետ կոչումներու տուչութիւն:
- Աստիճանատուչութիւն:
Խումբի մը անդամներուն կապերը զօրացնելու համար անհրաժեշտ են խմբային խաղերը: Խմբապետները խաղացին կարգ մը խմբային խաղեր, ապա ճաշէ ու դադարէ ետք, զրոյցի միջոցով ներկայացուեցան խմբապետ-խմբապետ, խմբապետ-ծնողք, խմբապետ-անդամ կապն ու յարաբերութիւնը. զրուցավարն էր քոյր Թալին Օրտողլեան: Ապա, Հ.Մ.Ը.Մ.ի Պէյրութի, Անթիլիասի եւ Ժըտէյտէի մասնաճիւղերու պատասխանատուներէն իւրաքանչիւրը ներկայացուց բաժին մը: Զրուցավարը համադրելով տեսակէտները առիթ տուաւ մասնակիցներուն փոխանակելու կարծիքներ:
Սեմինարին վերջին նիւթը ներկայացուց եղբ. Վաչէ Նաճարեան: Նիւթն էր` «Հ.Մ.Ը.Մ.ի սկաուտութեան ուղեգիծը»:
Սեմինարին աւարտին մասնակիցներուն փոխանցուեցան արժեւորման թղթիկներ, ապա իւրաքանչիւրը ստացաւ սեմինարի մասնակցութեան հաստատագիր:
Սեմինարի փակման արարողութեան ներկայ եղան Հ.Մ.Ը.Մ.ի Լիբանանի Շրջանային Վարչութեան անդամներ, մասնաճիւղերէ Սկաուտական Խորհուրդներու եւ վարչութիւններու անդամներ:
Շրջանային Սկաուտական խորհուրդին կողմէ խօսք առաւ քոյր Արտա Զէյթունեան, ապա եղբ. Վաչէ Նաճարեանի ձեռամբ սկաուտական բարձրագոյն «Արարատեան» կարգ ստացան եղբայրներ Տաթեւ Ադամեան, Մկօ Գէորգեան եւ քոյր Աննա Քէօմպէճեան:
Սեմինարը վերջ գտաւ «Յառաջ նահատակ» քայլերգով: